【台灣七字仔三百首】

首屆台灣文史營

首屆台灣文史營，聘請教授佮學者，
知會爆滿早報名，會凍參與好心情。
台灣文史第一屆，開學典禮鬧猜猜，
大大細細誠開懷，毋若媽祖笑咳咳。
土城聖母第一好，宗教文藝人呵咾，
本土文化來引導，台南首都再創造。
初次參加文史營，簡章亦無詳細影，
徵文作品早寫定，隨去報到隨繳件。
見咳笑肝誠難過，一丈九尺差即濟，
感覺鬱卒誠後悔，懵懂予人看笑詼。
今日寫批會不是，毋是叨工佮故意，
離譜錯誤永會記，請勿啼笑阮愚痴。
誤解若無講出來，心肝扑結袂自在，
毋對講予恁瞭解，心頭大石擲大海。
想卜將稿討回轉，懇請了阮的心腸，
毋通囥遐眾人問，見笑到遮作了斷。
參加文史誠福氣，感謝媽祖有保庇，
四暝五工攏好天，轉到厝內雨塊滴。
即擺予阮開眼界，即知七字誠可愛，
土城齊濟是人才，台灣文史鹿耳開。
地方民眾誠合同，表揚賢人有涵養，
聘請回鄉佮頒獎，流傳善風好名望。