【台灣七字仔三百首】

記第一屆台灣文史營

鹿耳門溪起風湧，土城聖母來降靈，
台灣文史掖幼種，發揚文化做尖兵。
來到台灣文史營，才知媽祖真靈聖，
指示起鼓佇土城，卜救台灣逶遮行。
鄉親序大囡仔兄，逐家同齊來報名，
挨挨陣陣入大廳，為著蕃薯堅心拼。
文史營內鬧猜猜，英雄好漢倚仝台，
文藝復興做伙來，台灣前途有光彩。
台灣文史是袂●，自細互人騙毋知
認賊做父不應該，還咱公道佇即代

鹿耳春潮
鹿耳春潮湧連湧，台江夕照滿天虹
漁民討海無時閒，土城媽祖保民生

鹿耳連帆
鹿耳連帆帆接帆，海天一線無看縫；
看天食飯討海人，風調雨順好年冬。

食西瓜講好話
西瓜紅紅閣真甜，予咱歲壽年年添。
西瓜圓圓皮青青，予咱逐家食佰二。
西瓜食著術術叫，媽祖看甲微微笑。
西瓜好食皮滑滑，予咱快樂袂鬱卒。