鹿耳門外海湧聲，三更半暝夢中聽，
風雨台江蕃薯囝，疼惜台灣作伙行。
鯤鯓古名想海翁，祖先土地千萬冬，
大船小船出入港，文化搖籃講台江。
烏白恐嚇扑飛彈，祖國空夢緊看破，
一統王朝已黃花，民主潮流新國家。
作官發財逐家愛，點香燒金矻矻拜，
做人理路無照排，枉費心思汝莫來。
母語文學台灣魂，聲聲句句為囝孫，
疼田疼園疼溪圳，花開芳透滿山村。
汝我放伴文史營，上課了後歡喜行，
古早褒歌汝愛聽，唱出先民的心聲。
來做學員無為啥，為著台灣伊的名，
四面八方鑼鼓聲，心頭定定自在行。
歌詩唱起大廟埕，聲聲情義媽祖聽，
舉香拜拜喙唸啥，敢是台灣會留名。
鄉親問我偌濟歲，年近五十頭毛白，
無頭無路罔教冊，學校陪伴少年家。
莽莽山頭風雨聲，茫茫一片斟酌聽，
借問媽祖敢有疼，住民為何流浪命。