漁夫正名蔡奇蘭，開辦文史頭一層，
出錢出力是好漢，通人呵咾有夠讚。
漁夫頭殼爻淪鑽，來揣聖母的廟門，
委員會議決預算，搶救母語的田園。
漁夫頭殼真正爻，南北名師請透透，
每節時間講甲夠，卜教學員會出頭。
工作籌備無蓋久，漁夫本人有番咐，
每組工作不願輸，開幕典禮赴赴赴。
南葉北鍾大會合，學堂學生坐密密，
逐家聽甲耳仆仆，事實證明無白賊。
漁夫毋是為私利，做事出力閣出錢，
五王媽祖會保庇，合家平安大趁錢。
土城地方鹹分重，漁夫也是在地人，
即款頭路毋通放，繼續開辦數百冬。
做著歹園望後冬，娶著歹某一世人，
文史資源毋通藏，向望代代出爻人。
漁夫矻力閣爻行，學員招收二百名，
做事認真擱扑拼，拼出文學大出名。
廟口暗時風微撒，每晚一場精彩戲，
毋捌的人黑白指，當作咧唱思想起。
工課做了有紲拍，學員報名電話吵，
名額招收飽飽飽，害阮阿惠紲跳跤。
文史頭屆鹿耳門，主任委員有拍算，
即回成果收來囥，希望延續會久長。
漁夫做事拼命衝，編造手冊落文章，
代誌咧做有設想，閣辦傑出來表揚。
媽祖殿內微微笑，呵咾漁夫做了著，
文化歷史要寶惜，可比一粒藍寶石。
漁夫旅居佇海外，關心故鄉受拖磨，
為著地方勿看破，請將文史救予活。
文史開營頭一屆，聖母廟內鬧猜猜，
服務不週請諒解，希望明年閣再來。
媽祖神威法無邊，開營好天來出現，
教室學員咧共勉，向望後冬再結緣。
食魚食肉著菜佮，進哥褒歌唱來合，
崑獅墨寶一大疊，一場好戲穩無差。
邱進先生草地寶，年近七十無奈何，
經商頭路袂曉做，會唱民謠來相褒。
阿進頭殼有夠巧，會唱褒歌數百條，
媒體採訪兼拍照，實在銑甲掠袂稠。
崑獅土城的人氏，一生攏是咧飼魚，
雖然毋捌真濟字，閣會寫字佮做詩。
作品歸堆疊厝內，請伊展示講無愛，
即回展出開眼界，實在一個好天才。