記頭屆台灣文史營
土城釘根人人褒，聖母顯靈爻伐落，
台灣本土有倚靠，文史發揚在鯤島。
土城有名放煙火，文化提倡無機會，
三不五時受人詼，平平媽祖差赫濟。
土城頭屆辦文史，執掌大旗是漁夫，
絞盡腦汁毋認輸，能文能武真合軀。
空喙薄舌了憨工，籌備會議無輕鬆，
邀請爻人鬥相共，用心稽考有所望。
三顧茅蘆請國師，田園之秋飛過區，
台灣史綱會發珠，北港香爐分香灰。
台灣文史傳香火，蕃薯仔囝來炊粿，
祖公歷史咱愛背：阿娘的話咱來揣。
台灣文史頭一擺，報紙媒體爻舖排，
轟動海內通世界，報名夠額兼滿台。
四暝五工文史營，暗頓食飽緊起行，
觀賞晚會好心情，笑破腹肚叫阿娘。
土城頭屆文史營，圓滿結束心頭定，
滿載文史寬寬行，明年閣來拼輸贏。
學員吐詩泵泵滾，七字仔詩來釘根，
台灣史詩百外本，漁夫贈送笑呅呅。