用詩寫台灣歷史，罕得看見。用閩南語七字仔詩寫台灣歷史， (佫恰khah)出奇。當今的時代，常出現出奇的人出奇的代志。蔡奇蘭先生以筆名鹿耳門漁夫即個名字，用台灣民間喜愛的七字仔句寫了即部上中下三卷的「台灣史詩」，就是出奇的人出奇的代志。
我讀了鹿耳門漁夫即本「台灣史詩」，真是感動佫歡喜。感動的是，伊的創造精神，頑強意志，互人佩服不已。歡喜的是，台灣的歷史，頂頂下下有幾落千年，赫(hiah)尼濟(che)的大代志，赫尼大的滄桑變機，蔡奇蘭先生有法用台灣七字仔詩來記載，概括簡約佫有意象，氣勢宏大佫有情味，音節整齊韻律佫真和美，讀了互人迴腸蕩氣，看了互人有無(bu)窮的回味請看頭一首開頭的幾句詩：
台灣原早生番島 南島民族愛七迌
射鹿生活無所靠 不時腹肚咧呼餓
破病沉重找巫婆 刺字滿面花梭梭
手拿一支是番刀 建築房屋大樹剉
部落排列百步蛇 爬高爬低像猴母
風颱若到用大索 一日到暗唱山歌
山地姑娘好舞蹈 十六少年學大哥
只用十四句九十八字，就將台灣原始住民的性格習俗，風光情味，概括甲則(chiah)尼簡約準確，描寫甲赫(hiah)尼生動細緻，入韻的赫尼和協，用詞又佫是則尼水(sui)氣(khui)，互人讀了印象深刻，好讀佫好記。
第十四首寫了喪權辱國的賣國賊出賣台灣互日本，台灣百姓佇(ti)日本殖民統治下所過的悲慘生活甲日子：
馬關條約簽了後 佰萬台民大聲哭
親像母子斷了喉 將子擲乎日本狗
‧‧‧‧‧‧‧
日軍刣人沒分寸 全莊總殺攏無剩
枉死一萬四仟魂 懷念祖國無怨恨
讀到遮(chia)，啥人？目屎操操(chhau)滴，啥人？心肝碎腸仔裂(lih)。對骨肉同胞的同情，對殖民者的仇恨，不由對心底衝(chhing)起
頂面只是順手講兩例。像即款的例，要(beh)講野佫真濟(che)，相信讀者讀了看了，著(tioh)會有真深刻體會，不免我佫囉嗦加(ke)講話。
鹿耳門漁夫是新崛起的台灣民間詩人，伊一開始著選擇即款佇閩台地區有著
深根肥土的七字仔句來創作。我想，只要伊執著追求，鍥而不捨，佫注意深思熟慮，精益求精，就一定會將七字仔詩即蕊紅花，開甲真水(sui)真好勢，甲咱(lau)台灣民間鄉土文學增光添彩，互伊光照寰宇，流芳百世。
一九九六年秋寫佇廈門大學
（本文作者為廈門大學中文系教授
福建省語言學會副會長
中國音韻學研究會理事）