序『鹿耳門漁夫詩集』
畏友蔡奇蘭先生筆名兼道號「鹿耳門漁夫」，是一位商界的(e)奇人，又佫(koh)是文藝界的異數。伊做建築生理成功有趁錢，「知足常樂」，將近十冬來，「轉途」投入去參與文藝創作，專門寫台語詩。想起十冬前，刑法一百條廢除，烏名單走入去歷史，我即有機會回國解除心悶。每年利用寒暑假，轉去台灣為本土語言文化做淡薄仔服務。有一擺著(di)南鯤鯓文學營熟似 (sai)鹿耳門漁夫，伊送我非賣品，是伊的台語詩作「台江詩刊」，以後經常郵寄來東京分(pun)我享受。 會曉(e hiau)講台語的人相當濟(ze)，毋拘(m koh)會曉讀台語文的人， (dioh)無足濟，抑若(yah na)會曉寫台語文，又佫寫會好、寫會sui(美)猶(yau)佫卡oh cue(難找)。因為，台語有真濟語詞並無漢字通(thang)寫，又佫字母音標ma無標準化、制度化。台語書寫的工具(文字、字母音標)無健全，講會出晬 (cui)寫bue溜掠佫讀無路來，實在足怨嘆。 但是，愛知影，台語歷史源遠流長，音樂性上一等sui(美)，韻律(rythm)感上豐富的語言。因為，台語的音韻有文言音(讀冊音)佮(kap)白話音(講話音)二種系統，所以音韻比別種語言加重(ding)倍濟(多)。佮再，台語的母音佮韻母ma比別種語言濟濟濟。台語除去有常音的母音六種(a、o、e、 、i、u)，佮有鼻音化的母音四種(a、o、e、i )以及鼻音化韻母21種。另外韻尾子音分舒聲~m、~n、 ~ng三種，以及入聲~p、~t、~k三種。佫來，聲調七種，連音(讀)定(dioh)愛變調(表示軟勢)。以上有即寡音素、這仔兮特徵攏是展現音樂性、韻律感的factor(要素)，亦就是講台語是足適合寫詩的語言 著詩(dioh)是歌，日本人(儂lang)將詩佮歌攏讀做（wuta），(l an)是「詩歌」(si kua)一体做伙讀。詩毋定(m nia)寫情，ma是言志。詩是文學的嬰仔，也(a)是老翁(ong)，是文學的花莓(hue m)佫是文學的精華。寫詩實在無簡單，寫台語詩佫卡無容易，上困難兮(e)是用台語寫台灣史詩。 鹿耳門漁夫以早發表di(著)「台江詩刊」的台語詩竟然是台灣白話史詩。史詩(epic)是長篇的敘事詩，敘事是指敘述歷史人物的故事。台灣文學史裡，雖然有客家的「渡台悲歌」，佮有福老的「勸人莫過台灣歌」，無毋(m dioh)攏是歌詩，卻毋是史詩。漁夫真勇敢敢(ka)對史詩挑戰，看伊的體裁佮用字，完全用白話音七字漢字，句尾有押韻，漢字有兮充做借音用(無管字義)，有兮訓用字義無合語音，即寡特徵正是「歌仔冊」共款有兮。 歌仔冊(kua a ceh)是一種小冊，差不多明信片大，薄薄仔大約十張，用手寫的叫做歌仔簿。所謂「歌仔」是用七字漢字寫的韻文，內容主要有歷史故事(例如：鄭國姓開台灣歌)，有勸世歌、三伯英台歌.....。即款歌仔冊，最初di 19世紀早期產生於閩南，而1930年代di台灣足時行(kia )，中日戰爭後被禁止，終戰後有一站佫出現。因為每句有七字，所以又叫做「七字仔」。漁夫的台語詩作品体裁學七字仔，內容也互人分享歌仔冊彼款充滿通俗的、鄉土的草根性氣味。而漁夫的台灣史詩則是後來居上，大大超過歌仔冊，真正是青出於藍而勝過藍。 即擺漁夫卜(beh)將伊十冬來創作的台語詩整理出版，伊的內容有：台灣白話史詩、台灣人兮悲歌、台灣白話三字經、台灣白話童謠十二生肖歌以及其他抒情雜感等。這仔兮琳琅滿目的詩篇，按體裁形式來看，「七字仔」上濟，史詩全部攏用七字句，台灣人兮悲歌35首內底有16首是七字句。其他歌詩除去台灣白話三字經全部用三字句以外，則是用長短句。所以會用講七字句的詩是漁夫詩作兮主流。佫按音韻觀點來看，無論七字句、三字句、抑是長短句，全部共同特點(dioh)攏總講究押韻，這是漁夫的詩也(a)是歌的上大特色。有押韻，毋定(mnia)好念佫好記，親像歌仔冊；『唸歌算是好代誌，讀了若熟加(ke)別(bat)字，穡(sik)頭。(lan)若做完備，閑閑通(thang)好念歌詩』。 續(sua)落來，ka看伊的內容，重頭戲是史詩，分兩部，前部14首，按古早夠清末割台，後部10首，敘述日本時代。戰後50冬部分分散di台灣人兮悲歌內底。上好，以後會當將即部分匯整起來，使互史詩上、中、下，完成「台灣史詩三部曲」。史詩以外，親像政論、抒情、雜感、遊記、勸世..，讀伊的詩，吟伊的句，字字句句充滿人情味、鄉土愛，上介感心是伊的台灣情，對台語文化的熱愛苦戀之情。 漁夫毋是台灣史專家，ma毋是台語專家，莫講長期以來台灣歷史被禁忌，台語受封殺又佫文字音標霧sa sa，伊有即番成就無簡單，ma koh我想卜(beh)苛求，有寡史實愛佫〝推ciau〞(調整)，有一部分的字也調換，向望互完美。十冬苦心創作的台語詩集，會當(e dang)響亮出世，互我寫幾句歡喜話，來ka勉勵準做我的序。 2002年7月4日於東京 許極燉(明治大學) (本文作者為日本明治大學教授、 時事評論家、台灣福佬語文研究前輩)